रमेश रिजाल (Ramesh Rijal)

रमेश रिजाल जेनजी आन्दोलनपछि विघटित प्रतिनिधिसभाका सदस्य हुन् । यसअघि चारपटक सांसद् बनिसकेका रिजाल २१ फागुनमा हुने चुनावमार्फत पाँचौंपटक सांसद बन्ने दौडमा छन् ।

नेपाली कांग्रेसले यसपटक पनि प्रतिनिधिसभा सदस्यका लागि उनै अनुभवी नेतालाई पर्सा-५ बाट टिकट दिएको छ ।

२१ फागुन २०१३ सालमा पर्सा जगरनाथपुर गाउँपालिका–५, धर्मपुर मसिहानीमा जन्मिएका रिजालले वीरगञ्जस्थित ठाकुरराम बहुमुखी क्याम्पसबाट एमएसम्मको शिक्षा हासिल गरेका छन् ।

उनका बुबा मेघनाथ उपाध्याय २०१५ सालमा भएको पहिलो आमनिर्वाचनमा नेपाली कांग्रेसबाट उम्मेदवार थिए । बुबाको राजनीतिक बाटो छोरा रमेशले पनि समाए । उनी विद्यार्थी जीवनमा नेविसंघको राजनीतिमा सक्रिय बने । २०२६ सालदेखि २०४६ सालको अवधिमा पटक–पटक गरी ३ वर्ष जेल जीवन बिताए ।

पर्सा कांग्रेसको सचिवको जिम्मेवारीबाट पार्टी राजनीतिमा सक्रिय भएका रिजालले २०५९ सालमा प्रजातान्त्रिक कांग्रेस गठन हुँदा शेरबहादुर देउवालाई साथ दिए । विशेष महाधिवेशनमा पनि उनी देउवाकै पक्षमै खुले ।

राजनीतिमा निकै उतारचढाव बेहोरेका रिजाल पार्टी अनुशासन समिति संयोजक, कार्यसम्पादन समिति सदस्य र मधेश प्रदेश संयोजकको भूमिकामा समेत रहे ।