जालिम मियाँ मंसुरी (Jalim Miya Mansuri)

पर्साको जगरनाथपुर गाउँपालिकाको जगरनाथपुर गाउँका स्थायी बासिन्दा मन्सुरी १४ असार २००४ मा जन्मेका हुन् ।

साधारण लेखपढ मात्रै गरेका पाका नेता मन्सुरी राजनीतिमा भने खरो र स्पष्ट वक्ताका रूपमा चिनिन्छन् ।

२०२८ सालदेखि नै राजनीतिमा संलग्न मन्सुरीले नेपाली कांग्रेस र तत्कालीन नेकपा माओवादी केन्द्र रहेर समेत काम गरेका थिए ।

२०७४ सालको स्थानीय तह निर्वाचनमा जगरनाथपुर गाउँपालिका अध्यक्षमा निर्वाचित भएका उनी गाउँपालिका अध्यक्ष रहेकै समयमा तत्कालीन माओवादी केन्द्र परित्याग गर्दै नेकपा एमाले प्रवेश गरेका थिए ।

२०७९ सालको प्रतिनिधिसभा सदस्य निर्वाचनमा उनले एमालेका तर्फबाट पर्सा-४ बाट टिकट पाएका थिए । तर नेपाली कांग्रेसका उम्मेदवार रमेश रिजालसँग पराजित भए ।

रिजालले ३१ हजार २२४ मत पाएर विजयी हुँदा उनी २५ हजार ६७१ मत ल्याएर दोस्रो भए ।

२०८२ सालको प्रतिनिधिसभा सदस्य निर्वाचनमा पनि मन्सुरीले उनै रिजाललाई मुख्य प्रतिस्पर्धी पाएका छन् । 

यो क्षेत्रबाट नेपाली कम्युनिस्ट पार्टी (नेकपा) ले जयप्रकाश थारूलाई उम्मेदवार बनाएको छ ।