जनता समाजवादी पार्टी, नेपाल

जनता समाजवादी पार्टी (जसपा), नेपाल मधेश आन्दोलनबाट राष्ट्रिय राजनीतिमा आएको शक्ति हो । अन्तरिम संविधान-२०६३ प्रति असन्तुष्टि जनाएर उठेको मधेश विद्रोहकै जगमा जसपा निर्माणको आधार तयार भएको थियो । यद्यपि त्यसबेला मधेशी जनाधिकार फोरम, सद्भावना पार्टी, तमलोपा लगायत ब्यानरमा मधेश आन्दोलन चल्यो । त्यस मध्ये उपेन्द्र यादव नेतृत्वको फोरमको प्रभाव सशक्त थियो । २०५४ सालदेखि गैरसरकारी संस्था रुपमा चलाइरहेको फोरमलाई मधेश आन्दोलनपछि यादवले राजनीतिक पार्टीमा परिणत गरेका थिए । फोरमको ब्यानरमा आन्दोलन चर्किएपछि नेपाली कांग्रेस, नेकपा एमाले, राप्रपा लगायत राजनीतिक दलहरूमा आबद्ध नेताहरूले पार्टी परित्याग गरी मधेश केन्द्रीत राजनीति थाले । मधेश आन्दोलनकै जगमा २०६४ सालको पहिलो संविधानसभा निर्वाचनमा फोरमले ५४ सिट जित्दै चौथौं राजनीतिक शक्तिको हैसियत बनायो । अरु मधेश केन्द्रित दलहरूले पनि उल्लेख्य संख्यामा जित निकाले । यसपटक भने फेरि महन्थ ठाकुर नेतृत्वको लोसपासँग एकता गरेर एकताबद्ध जसपा नेपाल चुनावमा होमिएको छ ।