जीवन घिमिरे (Jiwan Ghimire)

पार्टीका पूर्व केन्द्रीय कमिटी सदस्य समेत रहेका घिमिरे २०१८ सालमा खोटाङमा जन्मिएका हुन् ।

झापास्थित जनआदर्श विद्यालय शिवगञ्जबाट उनले कक्षा ८ सम्मको अध्ययन पूरा गरे । स्नातक तहसम्मको अध्ययन पूरा गरेका उनले अखिलको प्रारम्भिक कमिटीको नेतृत्व गर्दै विद्यार्थी राजनीति सुरु गरेका थिए  ।

२०३७ सालको पार्टी आन्दोलनका क्रममा उनी २ महिना जेल परे । २०४१ सालमा उनीमाथि राजकाजको मुद्दा लगाएर जेल हालिएको थियो । २०४३ सालमा एमाले पार्टी सदस्यता लिएका उनी तत्कालीन पार्टी महासचिव मदन भण्डारी निकट थिए ।

अनेरास्ववियु संगठन विभाग प्रमुखसमेत रहेका उनी अञ्चल कमिटी सदस्य, अञ्चल सचिव हुँदै नवौं महाधिवेशनमा केन्द्रीय कमिटी सदस्य तथा पार्टी प्रशिक्षण विभाग प्रमुख तथा तत्कालीन कोशी इन्चार्ज बनेका थिए । गत महाधिवेशनमा उनी सचिवको आकांक्षी भए पनि केन्द्रीय सदस्य मात्रै बने ।

२०७४ सालमा घिमिरे प्रदेश सांसदमा निर्वाचित भएका थिए । प्रदेश-१ (हालको कोशी प्रदेश) सरकारको सामाजिक विकास मन्त्रालयको जिम्मेवारीमा करिब ३ वर्ष रहेर काम गरेको अनुभव घिमिरेसँग छ ।

कोरोना महामारी विरुद्ध पूर्वतयारी र संक्रमण नियन्त्रणमा प्रदेश सरकारको तर्फबाट उनले  प्रभावकारी भूमिका निर्वाह गरेका थिए ।