पुकार बम (Pukar Bum)

कोरोना महामारीमा पीडित नागरिकप्रति राज्यलाई जवाफदेही बनाउन साथी ईः सँग पुकार पनि १२ दिन सत्याग्रह (आमरण अनसन) बसेका थिए । कोरोना महामारीमा विपन्न व्यक्तिहरूलाई काठमाडौंको खुलामञ्चमा निःशुल्क खाना खुवाउने काममा उनले नेतृत्वदायी भूमिका खेले । कोरोनाकालमा विभिन्न ठाउँमा सहयोग जुटाएर ५०० भन्दा बढी अक्सिजन कन्सन्ट्रेटर र सिलिन्डर लिएर बिरामीहरूको घर–घर पुगे उनी ।

पुकारले २०७० को दोस्रो संविधानसभा र २०७४ को प्रतिनिधिसभा निर्वाचनमा काठमाडौं–८ बाट प्रतिस्पर्धा गरेका थिए । ती दुई निर्वाचनमा उनी छैटौं र तेस्रो स्थानमा आएका थिए ।

गत निर्वाचनमा काठमाडौं–१ मा रास्वपाबाट उम्मेदवार बनेका पुकारले ४ हजार ११५ मत प्राप्त गरेका थिए । पुकारले पाएको मत तेस्रो स्थानको मत हो । यस क्षेत्रमा गत निर्वाचनमा प्रकाशमान सिंहले जित्दा उनको प्रमुख प्रतिस्पर्धी राप्रपाका रविन्द्र मिश्र बनेका थिए ।

२०७० सालदेखि कांग्रेसका गगन थापाले जित्दै आएको क्षेत्रमा पुकार यस पटक प्रतिस्पर्धी बनेका छन् । यो क्षेत्रमा गत निर्वाचनमा प्रत्यक्ष र समानुपातिक दुवैतर्फ कांग्रेस पहिलो शक्ति बनेको थियो । समानुपातिकमा रास्वपाले तेस्रो स्थानको मत पाएको थियो ।