सचिन तिमल्सेना (Sachin Timalsina)

नेपाली कांग्रेसले काठमाडौँ–४ बाट ३३ वर्षीय सचिन तिमल्सेनालाई उम्मेदवार बनाएको छ । २०७०, २०७४, २०७९ मा यो क्षेत्रबाट प्रतिनिधिसभा सदस्य जितेका पार्टी सभापति गगन थापा मधेस झरेर सर्लाही–४ मा उम्मेदवार बनेपछि तिमल्सेनालाई कांग्रेसले उम्मेदवार बनाएको हो ।

त्रिभुवन विश्वविद्यालयबाट द्वन्द्व, शान्ति र विकास विषयमा स्नातकोत्तर पास गरेका तिमल्सेनाले अमेरिकाको हार्वर्ड केनेडी स्कुलबाट नेतृत्व र संगठनसम्बन्धी विशेष कोर्ससमेत पास गरेका छन् ।

सचिनका पिता सुरेन्द्रकुमार तिमल्सेना कांग्रेस महासमिति सदस्य र आमा क्षेत्रीय प्रतिनिधि बनिसकेका थिए । उनी भने पार्टीको क्रियाशील सदस्य मात्रै हुन् । २०७५ देखि २०७९ सालसम्म युवा कांग्रेसका संस्थापक अध्यक्ष बनेर काम गरेका सचिन क्रिकेट कमेन्टेटरका रूपमा पनि परिचित छन् । नेपाल प्रिमियर लिग, नेपाली कमेन्ट्री, नेपाल–वेस्ट इन्डिज ऐतिहासिक शृंखलालगायत दर्जनौँ प्रतियोगितामा उनले कमेन्ट्री गरिसकेका छन् ।