राजन भट्टराई (Rajan Bhattarai)

२०२५ साल असारमा सिन्धुपाल्चोकको सिन्धुकोटमा जन्मिएका भट्टराई नेकपा एमालेको तर्फबाट फागुन २१ को प्रतिनिधि सभा सदस्य निर्वाचनमा काठमाडौँ क्षेत्र नम्बर ४ बाट तेस्रो पटक प्रतिस्पर्धा गर्दैछन् । २०७४ र २०७९ सालमा कांग्रेसका गगन थापासँग पराजित भट्टराईलाई एमालेले तेस्रो पटक पनि सोही क्षेत्रबाट उम्मेदवार बनाएको हो । अन्तर्राष्ट्रिय मामिलाका जानकार भट्टराईले त्रिचन्द्र कलेजबाट स्नातक र युनिभर्सिटी अफ लन्डनबाट अन्तर्राष्ट्रिय सम्बन्धमा स्नातकोत्तरसम्म अध्ययन गरेका छन् । त्यसपछि २०६९ सालमा भट्टराईले जवाहरलाल नेहरु विश्वविद्यालयबाट विद्यावारिधि गरे ।

अनेरास्ववियुको विद्यार्थी संगठनबाट राजनीति थालेका भट्टराई २०४०–४६ सालका बिचमा १२ पटक पक्राउ परे र जेल सजाय भोगे । 

२०५३ पछि नेकपा (एमाले)को विदेश विभाग सचिव र २०५४–५८ सालमा उपत्यका समन्वय कमिटी सदस्य भएका भट्टराई एमालेको नवौँ महाधिवेशनबाट केन्द्रीय सदस्य निर्वाचित भए । एमाले अध्यक्ष केपी शर्मा ओली प्रधानमन्त्री हुँदा उनको परराष्ट्र सल्लाहकारको भूमिका पाएका डा. भट्टराई यसबिचमा नेपाल–भारत प्रबुद्ध व्यक्तिहरूको समूह (ईपीजी)का सदस्य पनि रहे । त्यसअघि माधवकुमार नेपाल प्रधानमन्त्री हुँदा पनि परराष्ट्र सल्लाहकार रहेका भट्टराई दोस्रो संविधानसभामा समानुपातिक सभासद् बने ।