जनार्दन शर्मा (Janardhan Sharma)

२०६४ देखि २०७९ सम्म लगातार चार पटक निर्वाचन जितेका जनार्दन शर्मा पाँचौँ पटक जित निकाल्ने गरी रुकुम पश्चिमबाट प्रगतिशील लोकतान्त्रिक पार्टीबाट उम्मेदवार छन् । तत्कालीन माओवादी केन्द्रको उपमहासचिव रहेका शर्मा जेनजी आन्दोलनपछि माओवादीलगायतका पार्टीबिच भएको एकता प्रक्रियामा सहभागी भएनन् । बरु उनले जेनजी आन्दोलनको भावना समेट्न भन्दै प्रलोपा गठनमा अग्रसरता देखाएका थिए । यद्यपि उनी हाल प्रलोपाको केन्द्रीय सदस्य मात्र हुन् । 

२०१९ वैशाखमा रुकुमको सेरीगाउँमा जन्मिएका जनार्दन शर्मा २०५२ सालमा नेकपा (माओवादी)ले सत्ताविरुद्ध सशस्त्र सङ्घर्ष गर्दा सक्रिय सहभागी भएका उनी शान्ति प्रक्रियासँगै शान्तिमन्त्री, उर्जामन्त्री, गृहमन्त्री र अर्थमन्त्रीको जिम्मेवारी सम्हालिसकेका छन् । उर्जामन्त्री हुँदा शर्माले लोडसेडिङ अन्त्य गर्न खेलेको भूमिकाको अझै प्रशंसा हुने गरेको छ ।