प्रताप गुरुङ्ग (Pratap Gurung)

चितवन–२ मा नेपाली कम्युनिष्ट पार्टी (नेकपा) बाट उम्मेदवार रहेका प्रताप गुरुङ पहिलो पटक संसदीय निर्वाचनमा उम्मेदवार बनेका हुन् । उनी इच्छाकामना गाउँपालिका–३, फिस्लिङका बासिन्दा हुन् ।

यो क्षेत्रमा झण्डै १२ वर्षपछि पूर्व माओवादी केन्द्रले पहिलो पटक आफ्नै उम्मेदवार उठाएको छ । २०६४ सालको पहिलो संविधानसभामा नेकपा (माओवादी)का नारायणप्रसाद दाहालले यो क्षेत्रबाट निर्वाचन जितेका थिए ।

२०७० को दोस्रो संविधानसभा निर्वाचनमा चितवन–३ अन्तर्गत रहेको यो क्षेत्र २०७४ को निर्वाचनमा चितवन–२ कायम भयो । २०७४ मा माओवादी केन्द्रले नेकपा (एमाले)का कृष्णभक्त पोखरेललाई सहयोग गरेको थियो ।

२०७९ को निर्वाचनमा नेपाली कांग्रेसका उमेश श्रेष्ठलाई सघाएको कारण माओवादीको आफ्नै उम्मेदवार थिएन । लामो समयसम्म प्रत्यक्षमा उम्मेदवार नभएका कारणले साविक माओवादीको प्रभाव कमजोर भएको क्षेत्रको रूपमा लिने गरिएको छ । नेकपा युवा उम्मेदवार मार्फत जनमतको परीक्षण गर्ने तयारीमा देखिन्छ ।

२०५३ सालमा अखिल क्रान्तिकारीमा आवद्ध भएर माओवादी युद्धमा होमिएका गुरुङ २०५८ चैत १४ मा सेनाको गिरफ्तारीमा परे । सर्वोच्च अदालतको आदेशपछि २०६० असारमा रिहा भएका थिए ।

२०६२/६३ को ऐतिहासिक जनआन्दोलनमा पक्राउ परेर १९ दिन हिरासतमा बसे । २०६० मा नेकपा (माओवादी)को जिल्ला कमिटी सदस्य, २०६५ सालमा वाईसिएल (योङ्ग कम्युनिष्ट लिग) केन्द्रीय सदस्य/उपत्यका मजदुर वाईसिएलको संयोजक हुँदै तत्कालीन नेवाः राज्य समिति वाईसिएलको कोषाध्यक्ष भएर काम गरे ।