प्रकाश शरण महत (Prakash Sharan Mahat)

वि.सं. २०१९ साल ०७ महिना १९ गते बुवा खड्गबहादुर महत र आम टोलकुमारी महतको कोखबाट पञ्चकन्या–२, कविलास, नुवाकोटमा जन्मिएका डा. महत नेपाली कांग्रेसको तर्फबाट नुवाकोट–१ बाट उम्मेदवार छन् । 

२०७८ सालमा भएको कांग्रेसको १४ औँ महाधिवेशनमा महामन्त्री पदमा पराजित महतलाई सभापति शेरबहादुर देउवाले केन्द्रीय सदस्य र प्रवक्तामा मनोनीत गरेका थिए । 

२०३६ सालको विद्यार्थी आन्दोलन, २०३७ सालको जनमत संग्रह, २०४२ सालको सत्याग्रहमा सक्रिय भूमिका खेलेका डा. महत नेपाल विद्यार्थी संघको महामन्त्री पनि भए । 

२०५९ सालदेखि गत पुसमा विशेष महाधिवेशन नहुँदासम्म कांग्रेसको निरन्तर केन्द्रीय सदस्य रहेर काम गर्दै आएका थिए । उनी पार्टीको प्रवक्ता, केन्द्रीय सदस्य प्रचार विभाग प्रमुख भएर काम गरेका छन् । 

२०६३ सालको अन्तरिम व्यवस्थापिकाको सदस्य भएर संसदीय राजनीति सुरु गरेका डा. महत पहिलो र दोस्रो संविधानसभामा समानुपातिकतर्फ सांसद बने । २०७४ मा काठमाडौँ–५ मा उम्मेदवार बनेका डा. महत पराजित भए । फेरि ०७९ मा समानुपातिक प्रणालीबाट सांसद भए ।